توتا : يعني هي ماما ماتت ازاي يا ابيه حسام
يعني راحت فين !!
حسام : بصي يا توتا امسكي التليفون بتاعي دا خليه معاكي لغايه لما اعد لرقم عشرة ماشي
واحد
بعد 30 ثانيه
اتنين
بعد 3 دقايق
ثلاثة
أربعة
خمسة
ستة
سبعه
تمانيه
بعد 38 دقيقه بدأت تفرح بالموبايل وتلعب بيه
والو ومش الو
وبتكلم صديقها اللي مش من الارض بتاعتنا دي
تسعه
عشرة
حسام / هاتي الموبايل يا توتا
توتا / خليه معايا شوية
لاءة هاتي الموبايل زي ما اتفقنا لغايه عشرة عشان مش ازعل منك
طيب خد اهوا
واخدت التليفون منها
مش انا ياتوتا كنت هزعل لو ما كنتيش ادتيني الموبايل بتاعي
توتا / ما انت اخدته يا ابيه حسام
هو كمان ربنا ( لله المثل الأعلى ) كان بعت لنا ماما تقعد معانا شوية وبعدين لما خلص الوقت بعت ملاك عشان يرجعهاله تاني
لو كنا بئه مش رضينا كان هيزعل مننا
وهو ربنا يا توتا اكبر واحد في الدنيا دي كلها واقوى واحد
لو زعلناه مننا نروح النار صح
بس ماما وحشتني اوي يا ابيه حسام
وانا كمان
ادعيلها يا توتا
قولي ربنا يجمعنا كلنا في الجنه معاكي يا ماما ان شاء الله
عارف يا ابيه حسام
انا ان شاء الله لما اروح الجنه هعمل عزومة كبيرة زي اللي ماما كانت بتعملها لخالو كمال وخالو صالح وخالو امير وخالتي ................ جابت شجرة العائلة كلها واختصارا للوقت حذفت اجزاء لن تُحدث خلل في سياق كلام توتا
وبعدين ياتوتا هتعزمي مين فيها ؟
هعزم ماما وبابا وخالو فكري وخالو محمد <<<<< لم يتم ذكر اسمائهم اختصارا للوقت
وانا يا توتا
لو كنت موجود ومش مشغول زي كل مرة
وتقولي عندي شغل ولعبتني بالكمبيوتر
بيني وبين نفسي : اه يا ماديه ياتوتا ال طفله ال
هعزمك
وعايزة تعزمي مين يا توتا
كمان ينفع يا ابيه حسام اعزم ملايكة ويطيروا كدا فوق الترابيزة والعب معاهم
مش عارف يا توتا
طيب انا هعزم الرسول عليه الصلاة والسلام
ليه يا توتا ؟؟
عشان عايزة اساله حاجات
طيب عايزة تساليه ايه ؟؟
حاجات سر
لما اشوفه ان شاء الله هبقى اساله
تفتكر هيجي يا ابيه حسام ولا مش هيكون فاضي
مش عارف يا توتا اكيد ان شاء الله هيجي لو كان بيحبك وكنت بنوته طيبه وحلوة
طيب انا هروح اكتب ورقه فيها كل الاسئله بتاعتي عشان لما اشوفه مش انسى اي سؤال وافضل اروح له كل شوية ويزعل مني زي مس رغده في المدرسة تضايق مني لما بسالها كتير
راحت توتا وبعد خمس دقايق لقيتها رجعالي تقولي
ابيه حسام
نعم يا توتا
هي ماما نايمة لوحدها ازاي
يا توتا احنا مش اتفقنا ان ماما عند ربنا
لاءه يابيه احسام انا شفت ماما بتروح مكان كبير وفيه اود صغيرة وليها باب صغير وكانت بتاخدني معاها ولما كنت بسالها احنا وقفنا هنا ليه
قالت لي ان تيته موجوده هنا واقري ياتوتا سورة الفاتحه عشان تيته تحبك
يعني ماما دلوقتي في الاودة الصغيرة دي ؟
طيب هي مش هتخاف وهي لوحدها ؟
طيب هي عندها نور عشان مش تقعد في الضلمة ؟
طيب هي عندها سرير تنام عليه عشان مش تنام على التراب وهدومها تتوسخ ؟
بيني وبين نفسي : ايه دا امال هو فين بابا يرحمني شوية من اسئلة توتا
ويجاوب هو عليها طيب ما هاني موجود ما تسأله هو مفيش غيري في البيت
بيني وبين نفسي الطيبة : معلشي دي اختك الصغيرة ومش فاهمه وبعدين لازم تكون حنين معاها دي بنت وحيده صغيرة
بيني وبين نفسي الشرير : طيب خلاص امري لله
طيب هي فاكراني يا ابيه حسام يعني هترجع تسلم علينا ؟؟
وجاءت النجده اخيرا
تررن تررن تررن تررن
تليفون يا توتا ورحت ارد على التليفون
انا مؤمن بقضاء ربنا وقدره وراضي وصابر والحمد لله
اللي بيوجعني اسئلة توتا اللي بحاول اهرب منها
عشان ما ابكيش ادامها ومش عارف ؟؟
وخايف دمعة من اياهم تنزل غصب عني
والاقي توتا تمطرني بوابل من الاسئلة الحارقه اللي توجع دي
يارب صبرك ورحمتك
2 comments:
ياااااااااااه انا دوخت بجد عقبال ما عرفت اجى المدونه هنا تانى بس عمنا جوجل انقذنى الصراحه
اولا ربنا يصبرك حسام وربنا يرحمها ويرحم موتى المسلمين جميعا
تانى حاجه الاسئله عن الموت ورحيل الاشخاص بتبقى اكتر اسئله الواحد ا بيعرفش يرد عليها بأيه ولا يقول ايه عن الناس الى بتسال وخصوصوا لو كانت طفله صغيره بتبقى اسئلتها عفويه جداااا وفى نفس الوقت مؤثره جدااااااااااا
يااااااااااه
ربنا يرحمها يارب
بس بجد المثل اللي جبته حلو اوي
بس عارف ساعات من صدمتنا مبنكنش مسدئين سبحان الله
بس انا فرحانة انك اخيرا اخيرا اخيرا المحكمة بئت محكمة وبئى فيها بوستات
Post a Comment